கற்றுக்கொள்ள ஓரிடம்

திரைப்பட ஒளிப்பதிவின் ஆதார தொழில்நுட்பங்களையும், காட்சி அழகியலையும் அடித்தளமாகக் கொண்ட பகுதி இது. காட்சிமொழி, திரைமொழி மற்றும் டிஜிடல் ஒளிப்பதிவில் உள்ள சிறப்பம்சங்கள், அதன் இயல்புகள், சாதக பாதங்கள் மற்றும் சிக்கல்களையும், ஒளிப்பதிவின் பிற அடிப்படைப் பாடங்களையும், ஒளிப்பதிவுக்குப் பிறகான பிற்தயாரிப்புப்பணிகள் குறித்த அறிமுகத்தையும் இப்பகுதி விரிவாக பாடங்களைக் கொண்டிருக்கும். பயிற்சி வகுப்புகளின் மூலமாக பல்வகை டிஜிடல் பதிவு வகைகளில் உள்ள சிறப்பம்சங்கள் மற்றும் குறைகள், காட்சிச் சட்டக அமைப்பு, காட்சித்துண்டுகளின் வகைகள், கேமரா நகர்வுகள், ஒளி மற்றும் ஒளிச்சேர்க்கைகளின் கட்டுப்பாடு போன்றவற்றைக் கற்கலாம்.

புகைப்படங்களை எடுப்பதைப்போலவே காணொளிகளை உருவாக்குவது தனித்தன்மை வாய்ந்த ஒரு கலையாகும். வாழ்வின் அற்புதக் கணங்களை நிரந்தரமாக உறைய செய்திடும் புகைப்படங்கள் ஒருபுறமென்றால், காட்சி வடிவமாக, நகர்வுகலையாக நிகழ்வுகளை பதிவுசெய்திடும் ‘விடியோ’ தொழில்நுட்பம்  ஒருபுறம் நின்று, அத்தராசை சமன் செய்கிறது. இரண்டு துறைகளும் ஒன்றுக்கொன்று குறைந்ததில்லை. இரண்டுக்கும் அடிப்படை ஒன்றேயானாலும், வித்தியாசங்கள் பல இருக்கின்றன. இரண்டு துறைக்குமான பலம், பலவீனம், தகுதி, எல்லை என்பவை உண்டு. புகைப்படத்துறையில் வல்லவர், விடியோ துறையில் வல்லவராக இருப்பார் என்று சொல்லுவதற்கில்லை. காரணம், இத்துறைக்கென சில நுட்பங்கள் உண்டு. ஒளியமைப்பு, கேமரா நகர்வு, தொடர்ந்து இயக்கத்திலிருக்கும் தன்மை போன்றவை இதன் விதிகளை நிர்ணயிக்கின்றன. அவற்றைப்பற்றிய முழுமையான அறிவும் தெளிவும் இருந்தால் மட்டுமே, இத்துறையில் மிளிர முடியும். ஆவணப்படங்கள், குறும்படங்கள், விளம்பரப்படங்கள், திரைப்படம் என எதுவாக இருந்தாலும் அடிப்படை வீடியோ தொழில்நுட்பம் ஒன்றுதான். ஒரு வீடியோ கேமராவை எப்படி கையாள்வது? அதன் பாகங்கள் என்ன? ஒளியைப் புரிந்துக்கொள்வது, அதை பயன்படுத்துவது என கற்றுக்கொள்ள நிறைய இருக்கின்றன. இவ்வகுப்பு விடியோ துறைச் சார்ந்த உங்கள் அறிவை வளர்த்துக்கொள்ள உதவும். 

புகைப்படம் எடுக்க யாருக்குத்தான் விரும்பமிருக்காது? தொழில்நுட்பம் நம் அனைவரது கையிலும் ஒரு கேமராவைக் கொடுத்துவிட்டது. அது கைபேசியாக, கையடக்கக் கேமராவாக, DSLR கேமராவாக நம்மிடம் வந்து சேர்ந்துவிட்டது. ஆனால், அதை எப்படிக் கையாளுவது? ஒரு அற்புத கணத்தை சரியான விதத்தில் பதிவு செய்வது எப்படி? ஒரு சிறப்பான புகைப்படத்தை வெறும் கருவிகள் கொண்டு படைத்திட முடியாது. அதைக் கையாளும் மனிதனின் அறிவும் கலைத்தன்மையுமே அப்படங்களுக்கு உயிர்ப்பைத் தருகின்றன.ஒரு தொழில்நுட்பத்தின்  கூறுகளை, அதன் விதிகளை, அதன் நுட்பங்களை, அதன் சாத்தியங்களை முறையாகக் கற்றுக்கொள்வதும், அதை நடைமுறையில் பரீட்சித்து, அனுபவ அறிவை வளர்ப்பதுமே ஒரு முழுமையான கலைஞனை வளர்த்தெடுக்கும். அவ்வகையில் இவ்வகுப்பு, புகைப்படத்துறை குறித்தான உங்களின் அடிப்படை அறிவை வளர்த்தெடுக்க உதவும். 

உங்கள் பயணங்கள், நண்பர்கள்/உறவினர்களோடானான கணங்கள், வீட்டில் நிகழும் சுபகாரியங்கள், விழாக்கள் என எல்லாவற்றிலும், பதிந்து வைக்கக் கூடிய அற்புத கணங்கள் இருக்கவே செய்யும். அவற்றை உங்களிடமிருக்கும் கேமராவைக்கொண்டு (Mobile Phone Camera / Compact Camera / DSLR Camera) முறையாக, சிறப்பாக பதிவுசெய்வது எப்படி என்பதை கற்றுக்கொள்ளலாம். 

டிஜிட்டல் கேமராவின் பாகங்கள்,அது செயல்படும் விதம், அதன் அடிப்படைவிதிகள், துணைக்கருவிகள் ஆகியவற்றில் துவங்கி ஒரு தேர்ந்த புகைப்படக் கலைஞனைப் போல ஒளியை, சூழலைப் புரிந்துகொண்டு ஒருசிறந்த புகைப்படத்தைப் பதிவுசெய்வது எப்படி என்ற புரிதலை,அறிவை இவ்வகுப்பு கொடுக்கும்.  

நமது வாழ்வின் வசந்தங்களில் ஒன்று திருமணம்.நம் அனைவரின் வாழ்விலும் மறக்கமுடியாத ஒரு நிகழ்வாய் திருமணம் அமைந்துவிடுகிறது. புதிய உறவு இணைந்திடும் அந்நாட்கள் நம்பிக்கையும், எதிர்பார்ப்பும், மகிழ்ச்சியும் நிறைந்தது. மணமக்கள் மட்டுமல்ல, ஒட்டுமொத்த குடும்பத்திலும் பரவசமும்,கொண்டாட்டமும் நிறைந்திருக்கும் அக்கணங்களை காலத்தால் அழியா பதிவாக்கிடுவதில் புகைப்படங்களும், காணொளிகளும் முக்கிய பங்காற்றுகின்றன. அத்தகைய முக்கிய நிகழ்வை முறையாகப் பதிவு செய்திட தேவையான அடிப்படை அறிவை இவ்வகுப்பு கொடுக்கும்.

கேமரா, ஃபிளாஷ், துணைக்கருவிகள் எனத் துவங்கி புகைப்படத்துறையின் மொழி, கலைத்தன்மை, வழிமுறைகள் போன்றவற்றைக் கற்றுக்கொள்வதன் மூலம், அம்முக்கிய நிகழ்வின் பிரத்தியேகக் கணங்களை ஒரு தேர்ந்த கலைஞனாக நின்று, பதிவுசெய்திட உங்களால் முடியும். மேலும், எடுக்கப்பட்ட எண்ணற்ற புகைப்படங்களிலிருந்து சிறந்தவற்றை தேர்ந்தெடுக்கவும், மெருகூட்டவும், அதற்கு உதவும் மென்பொருட்களான Lightroom & Photoshop போன்றவற்றை முறையாகப் பயன்படுத்துவதற்கான பயிற்சியையும் பெறுவீர்கள்.

வணிக மயமான இன்றைய உலகில் விளம்பரங்கள் இல்லாத வணிகமென்று ஏதும் உண்டா என்ன.?! பத்திரிக்கைகளில் துவங்கி தொலைக்காட்சி வரைக்கும்  விளம்பரங்களே முன்நிற்கின்றன. புகைப்படக்கலையின் பிரிவுகளில் ஒன்று மாடலிங் புகைப்படப்பிரிவு. அழகை முன்நிறுத்தும் இத்துறைக்கென பிரத்தியேக கலை நுணுக்கங்கள் பல உண்டு. உடை, சிகை அலங்காரத்தில் துவங்கி, அரங்கவடிவமைப்பு,வண்ணத்தேர்வு, ஒளியமைப்பு, கம்போசிஷன் என பலவற்றைக் கற்றுக்கொள்ள வேண்டியதிருக்கிறது. பல்துறை வல்லுநர்களோடு இணைந்து பணியாற்ற வேண்டிய சூழலில், ஒவ்வொன்றையும் திட்டமிட்டு செயலாற்றவேண்டும். இத்துறை சார்ந்த Preproduction, Shoot, Postproduction போன்றவற்றைப் பற்றிய ஒரு முழுமையான அறிவை இவ்வகுப்பு கொடுக்கும்.

பயணங்கள் மனித உணர்வுகளை மீட்டெடுக்கின்றன என்றொரு சொற்றொடர் உண்டு. உணர்வுகள் சார்ந்து இயங்கும் படைப்பாளிகளுக்கு அது இன்னும் பயன்தரவல்லது. துவக்கநிலை புகைப்படக்காரரோ, அல்லது கலாநிபுணரோ இந்தக் கல்வித்திட்டங்களின் ஒருபகுதியாக பயணங்களைக் குழுவாக நாம் மேற்கொள்ளலாம். மூன்றல்லது நான்கு நாட்களாக அமையவிருக்கும் பயணம் கொடைக்கானல், பெங்களூர், கோவா, லேலடாக் என எதை நோக்கியதாகவும் அமையலாம். பயணத்தின் பகுதிகளாக அனுபவப்பகிர்வுகள், நேரடிப்பயிற்சிகள் போன்றன அமையும். அழகான, அரிதான பயணத்தளங்களில் மனிதர்களை, நிலவமைப்பை, இயற்கையை, இரவை, நெருப்பை என ஏராள விஷயங்களை அதனதன் உணர்வுகளோடு படம்பிடிக்கக் கற்கலாம், படம்பிடித்து மகிழலாம், திறன் வளர்க்கலாம்.

புகைப்படக்கலை, காணொளிப்பதிவு, திரை ஒளிப்பதிவு போன்ற துறைகளில் ‘ஒளியமைப்பு’ என்பது மிக இன்றியமையாத ஒன்றாகும். இத்துறைகளில், ஒளியமைப்பு பற்றிய அறிவும், புரிதலும் தேர்ச்சியடையும் ஒவ்வொரு படியும், நிபுணத்துவத்தை நோக்கிய பயணத்தில் மேலும் ஒரு அடியாகும். இயற்கையான ஒளி, கீற்றொளி விளக்குகள் மற்றும் படப்பிடிப்புத்தள விளக்குகளைப் பயன்படுத்தி உட்புற, மற்றும் வெளிப்புற படப்பிடிப்புக்குத் தேவையான ஒளியமைப்புகளை, காட்சி மற்றும் கருப்பொருளுக்கேற்ப சிறப்புற எப்படி அமைப்பது என்பதான பாடங்கள் இப்பிரிவில் உள்ளன. இயற்கை ஒளியினைப் புரிந்துகொள்வது, பயன்படுத்துவது போன்றவற்றில் பயிற்சி, ஒளியமைப்பு எப்படி காட்சியின் உணர்வுகளைப் பாதிக்கிறது எனும் பாடம், ஒளியின் நுணுக்கங்களையும், கூறுகளையும் புரிந்துகொள்தல் என ஆழ்ந்த நோக்குடன் இப்பிரிவின் பாடங்கள் ஏற்படுத்தப்பட்டுள்ளன.

அதிக பொருட்செலவு, நிறைய தொழில்நுட்பவல்லுநர்களின் பங்களிப்பு போன்றன இல்லாமல், ஏற்கனவே நம்மிடம் இருக்கும் எளிய வசதிகளைப் பயன்படுத்தியே சிறந்த குறும்படங்களை உருவாக்க எண்ணும் படைப்பாளிகள், எளிமையான, வேகமான அதேநேரம் கச்சிதமான ஒளியமைப்பை பயிற்சி வகுப்புகள் மூலமாக இந்தப்பிரிவில் கற்கலாம். எளிய பொருட்செலவிலும் ஒளியமைப்பில் பார்வையாளர்களிடம் பிரமிப்பை ஏற்படுத்தவல்ல எளிய, சிற்சிறு குறிப்புகள், தந்திரங்களைக் கற்கலாம். ஒளி, ஒளிப்பதிவு மற்றும் ஒளிப்பதிவுக்கருவிகளின் நுணுக்கங்கள், உட்கூறுகள் பற்றிய முழுமையான பார்வையும் கிடைக்கும். ஒரு காட்சிக்கு, அதன் உணர்வுக்குத் தேவையான ஒளியமைப்புக்கு அவசியமானவை என்ன என்பதை புரிந்துகொள்ள நீங்கள் ஆர்வமாக இருந்தால் இந்தப் பிரிவு உங்களுக்காகத்தான்.